FLT Work: Mare nostrum

1
Praeest terrigenum Roma phalangibus

2
	Principumque globi fert diademata,

3
	Venusti capitis sic rutilant comae

4
	Ut plaudant dominae millia gentium

5
In suam patriam Dux aquilam refert,

6
	Romam restituens imperialium

7
	Temporum veterum magnificentiae

8
	Et nostrum pelagus grande repostulans

9
Nulli qui noceant hoc mare nantibus

10
	Quantiscunque opibus noverimus frui,

11
	Nullius metuunt robora qui prius

12
	Stabant quam steterint Gallia et Anglia

13
Caesarum imperio paruit utraque,

14
	Obniti nequiens, atque proconsules

15
	Romanos habuit, neutra mare intimum

16
	Audacter petiit, non licitum sibi.

17
Verum temporibus posterioribus

18
	Ambas conspiciens Dux validissimas

19
	Effectas monuit ne veterascere

20
	Africam cuperent in manibus suis.

21
In terras reducem mox fore Numidum

22
	Norint Italiam quotquot eam negant

23
	Vetustis facibus posse resurgere,

24
	Occidisse rati sidera Caesarum.

25
Gallorum populo non fuit Hannibal

26
	Hostis terribilis, Gallia proelium

27
	Nullum indixit Afris: ut Scipionibus

28
	Carthago suberat, Gallia Caesari

29
Quae Gallis igitur jura tenentibus

30
	Tyrrheni mediam Corsicam et auream

31
	Punicam regionem, unde Quiritium

32
	Aucta tantopere est pristina gloria?

33
Cunctis innotuit quatenus imperent

34
	Gentes Ausoniae, scilicet Africae

35
	Provinciis quator. Dicite, quaesumus,

36
	Quibus terrigenis hoc mare pertinet?

37
Compelli nequeunt finibus egredi

38
	Interni oceani, Roma quibus potens

39
	Sireni1 Hannibalis temporibus fuit

40
	Et quorum tenuit sceptra diutius.

41
Expergiscimini, volvite palpebras,

42
	Nolite in tenebris progredi, ut hactenus

43
	Vobis impositum a conciliabulis,

44
	Sed nos intuiti, nos imitamini!

45
Mussoliniaca pace fruentium

46
	Dies praetereunt dulciter admodum:

47
	Spectate Hitlerium, teutonicum auspicem,

48
	Magni axis columen strati opera Ducis.

49
Utriusque opera sphaera revolvitur

50
	Satis magnifice, bella abeunt procul,

51
	Fraterna  accipiunt vincla libentius

52
	Alter alterius qui sitiunt necem.

53
Hebraeis tribubus sic penetralia

54
	Suarum domuum claudere gestiunt

55
	Et staliniacis, ne redeant datum

56
	Virus pestiferum magnopere inquinans.

57
Nonne Anglos volumus sic resipiscere

58
	Ut Gallos retrahant pernicie quoque?

59
	Cum staliniacis intereuntibus

60
	Fascium intereant quot doleant struem

61
Quam mirum facinus nuntiat organon!

62
	Ratus frugiferum non regimen fore,

63
	Mavult sarmaticas scindere cellulas

64
	Seque Moscoviae dicere Caesarem.

65
Delusa est igitur Gallia, quam decent

66
	Non hujuscemodi foedera turpia,

67
	Quae terras rubricent purpurea nece,

68
	Verum cum populis nobilioribus.

69
O Galli, geminis utimini polis

70
	Axis pacifici, non secus egerit

71
	Britannus populus; pace ita maxima

72
	Vetustissima pars floruerit globi.

73
Sic oportuerit stringere foedera

74
	Europam populos qui mediam incolunt

75
	Partesque occiduas ut frui ad invicem

76
	Sinantur paribus conditionibus.

77
Et tunc viderimus quot maria effluunt

78
	Ex nostro pelago ferre orientium

79
	Stellarum jubar et pace resurgere

80
	Saturni auriferi tempora fulgida!