FLT Work: In gentem Sabaudam

IN GENTEM SABAUDAM

DEI PROVIDENTIA POPVLIQUE ARBITRIO

ITALIAE REGNUM OBTINENTEM

FAVSTA PROLE AVCTAM

MDCCCCXXXVII.

Arcus fortium superatus est, et
infirmi accincti sunt robore.

Liber II Reg., c. II, 4.

1
Sublime donec stet Capitolium

2
arx et vetusti Martia Romuli

3
    flava pater collemque visat,

4
        Jane, tuum Tiberinus unda,

5
a stirpe vivax ut genus inclyta

6
plenis rogamus regnet honoribus,

7
    iuvante Fortuna paratum

8
        dura pati validumque civem,

9
sanctoque felix foedere conditum

10
suscepta divis munera Caesarum

11
    in saecula emensum nepotem

12
        proferat imperium secundis.

13
Mersas bono qui reddidit omine

14
res, restitutas Ille potens regat:

15
    Hunc alma Libertas vocatum

16
        in medio posuitque sortis.

17
Qui iunxit una cum populo ducem,

18
hinc paret aeque, aeque hinc amor imperat:

19
    spectans idem mens una, concors

20
        praesidium columenque rebus.

21
Quam spem fovemus progenies patrum

22
virtute partam, hanc prodat in alteram

23
    quae cedit aetas, se datura

24
        usque beata beatiorem.

∴

25
O vere Ausoniae tempus in ultimum

26
deductae Emmanuel missus ab Alpibus,

27
    queis Natura marique

28
        tutamen statuit soli!

29
Duris orta iugis robora sanguinis

30
acer milite Dux, regulus arbiter

31
    expertus, recinente

32
        saeva Scipiadum tuba,

33
augustas aquilas, augurio simul

34
augusto, in memores strenuus adtulit

35
    pugnas, in socia arma et

36
        pacti foederis in fidem,

37
defletam populo qui Patriam adderet,

38
quo certa Italiae sedibus in suis

39
    possent fata reponi,

40
        aevi principium novi.

41
Illo quis memoret quae duce gesserit

42
miles? pectora quo fuderit impetu?

43
    Quando proelia matres

44
        oderunt pavidae minus!

45
O vix Italiae vota superstitis

46
tandem nancta Virum! o denique libera

47
    tellus voce resultans

48
        conclamataque regna! Mox

49
concisi liquidum clangor ubi aëra

50
percussit litui signa domum ferens,

51
    priscos orsa triumphos,

52
        tum vox insonuit Ducis:

53
«Siste hic, signifer! hic stabimus optime:

54
cum turmis pedites vimque cohortium

55
    hinc mitti usque licebit».

56
        Hic et Rex stetit, hic manet.

∴

57
Haud cano mirum. Vigiles ut horae

58
molibus cedunt oculique seri1

59
    imminentque Urbi placidae micante

60
        lumina nocte,

61
tum polo sidus Tibi, Rex, ab alto

62
fulget evecto superas in auras,

63
    splendidum late nitet unde marmor,

64
        fulgurat aurum.

65
Mille Crux ardens radiis coruscat:

66
non repercussi iubaris tot ignes

67
    excitat, non sic vario renidet

68
        lumine, flamma.

69
Italis astrum viget in perenne

70
saeculum fatis populoque virtus

71
    et salus rebus decus atque coeptis

72
        auspiciumque.

73
Ab Iove adfulsit didicitque ab ortu,

74
cuncta in occasum rapiente motu,

75
    stare: quod par semper - io triumphe! -

76
        vincere signo.

77
Lucidae montes super apta acutum

78
intuens cervix aquilae remotos

79
    visa, nunc vincit propior minora

80
        sidera stella.

81
Clara per longos alit illa tractus

82
vividis ternos facibus colores:

83
    sol ita adversum trepidante nimbo

84
        aethera pingit.

85
Purpuram miscet rosa cum smaragdo:

86
candida lucent in iaspide orbes:

87
    Tuque, Rex, vultu rutilo comantem

88
        excipis ignem.

89
Gaudia inde adflant populi redempti

90
atque spes Magnum Patriae Parentem

91
    et renascentis nova per nepotes

92
        gloria Romae.

93
Stirpis a primo Tibi manat aevo

94
usque per gentem reditura virtus:

95
    prole avi exsultant, suboles decore

96
        gestit avorum.

97
Ipse, Rex, coetum, genus omne, noscis.

98
Hac rubent arma, hac et opes: virescit

99
    hac sacerdotum pia fronde laurus;

100
        victor ab hoste

101
candet hac ausus: sata regna primum:

102
(qua nivem fundens veluti Ipse puram

103
    gemma praefulges): color ora promit

104
        ingeniumque.

105
Nixa stans parma dea Roma, laeva

106
sustinens orbem, galeata miro

107
    haeret obtutu cupidoque solem

108
        combibit ore.

109
Seque tollens augur in astra Miles,

110
pectus effuso retegens nitori,

111
    - hic manes - clamat - pater atque custos...

112
        Perge, Sabaude! -.