FLT Work: Elpistus

ELPISTUS
____

1
Deposui patulae recubans sub tegmine fagi

2
    Non procul a ripa lene sonantis aquae,

3
Flore super viridi tua carmina, dulcis Horati;

4
    Lumina somnifero deseruique deo.

5
Tunc subit in mentem clara sub imagine vates

6
    Nescio quis, cithara suaviter ista canens.

7
Assiduo vos qui domuistis membra labore

8
    Ex urbe arcentes dedecus atque famem,

9
Eia, precor, dociles aures praebete, merenti

10
    Ominaque ex animo prospera ferte Duci.

11
Sic erat Augusto Maecenas carus ut olim

12
    Italiae Regi iure Benitus erit.

13
Optima prospiciens cunctis est forma gubernî,

14
    Ignaro vulgo patriciûmque choro.

15
Hi ratio, vires illi; sic itur ad astra,

16
    Sic florent urbes, regnat amica quies.

17
Sic erat Augusto Maecenas carus ut olim

18
    Italiae Regi iure Benitus erit.

19
Cum temere fabricas cepistis robore multo,

20
    Artifices, quaenam commoda? Nulla reor.

21
Mens aberat cunctas apto res ordine ponens

22
    Quae fuerat celeris machina mansit iners.

23
At nunc (cui laudes?) felix concordia regnat;

24
    Se ditant omnes Italiamque simul.

25
Sic erat Augusto Maecenas carus ut olim

26
    Italiae Regi iure Benitus erit.

27
Pertaesus plebis proceres si quaeris amicos,

28
    Iurgia tunc surgent, proelia dira, neces,

29
Bellum intestinum furiarum maxima pandens

30
    Hostibus indomitis absque timore viam;

31
Vel minus ecce malum populi secessus, Agrippa

32
    Quem prohibet nullus sit catus ore licet.

33
Coniurant modo membra caputque fideliter, auctis

34
    Divitiis maior cras erit ista quies.

35
Sic erat Augusto Maecenas carus ut olim

36
    Italiae Regi iure Benitus erit.

37
Pygmaei coelo moverunt horrida bella;

38
    Verbaque nunc Petrus publica laudis habet.

39
In solio doctrina micat virtusque laborque,

40
    Atque probi sumunt robora magna viri.

41
Vulnera segnitiem fraudes quodcumque nefandum

42
    Prosequitur claudo non pede poena scelus.

43
Qui praestant aliis ineunt et munia laudis,

44
    Obscuro latitant agmina inepta loco.

45
Sic erat Augusto Maecenas carus ut olim

46
    Italiae Regi iure Benitus erit.

47
Gemmarum instar Tergeste micat atque Tridentum;

48
    Plenum, Libertas, est opus omne tuum?

49
Restat adhuc Melite Nicaea et Corsica, membra

50
    Quae mox iungentur urbibus Ausoniae.

51
Faxit hoc in coelo regnans ut robora cuncta

52
    Pro Patriae impendam prosperitate meae.

53
Sed vereor ne quae prius inservire solebat,

54
    Plus aequo fastum nunc manifestet erae.

55
Sic erat Augusto Maecenas carus ut olim

56
    Italiae Regi iure Benitus erit.

57
Gurges ut immensus reseratur ianua Ditis;

58
    Orcum quis vitet terribilemque Stygem?

59
Qui nauci gazam semper vitamque pependit,

60
    Gestaque deseruit iuge canenda lyra.

61
Confregit saevos nemea sub rupe leones,

62
    Lernaeos angues, Gorgonis atque caput.

63
Infudit Patriae maioris robora vitae,

64
    Et meliora notat litora terrigenis.

65
Sic erat Augusto Maecenas carus ut olim

66
    Italiae Regi iure Benitus erit.